Լևոն Արոնյանը գերազանց հանդես եկավ Champions Chess Tour-ի 7-րդ փուլի Goldmoney Asian Rapid արագ շախմատի առցանց մրցաշարում՝ արժանանալով գլխավոր մրցանակին՝ 30 հազար դոլար պարգևավճարի:

Վլադիսլավ Արտեմևի հետ այսօր կայացած եզրափակիչ երկրորդ մրցախաղում դիմակայության ելքը վճռելու համար Արոնյանին բավարարեց նախատեսված 4 պարտիաներից երկուսը: Լևոնը երկու պարտիաներում էլ հաղթելով մրցակցին, դարձավ մրցաշարի հաղթող:

Հիշեցնենք, որ երեկ կայացած մրցակիցների եզրափակիչ առաջին մրցախաղում Լևոն Արոնյանը հաղթել էր 2,5-1,5 հաշվով:

Վլադիսլավ Արտեմևը 2-րդ տեղը գրավելու համար 15 հազար դոլար պարգևավճար ստացավ:

Հիշեցնենք, որ Արոնյանը Champions Chess Tour-ի նախորդ 6 փուլերում ընդհանուր առմամբ 66500 դոլար պարգևավճար էր ստացել: Նա ընդհանուր վաստակած  81 միավորով զբաղեցնում էր 7-րդ հորիզոնականը: Այս հաջողությունից հետո Լևոնը զգալիորեն կբարելավի դիրքերը մրցաշարային աղյուսակում:

3-րդ տեղը գրավեց Մագնուս Կառլսենը, որը 8,5 հազար դոլար պարգևավճար ստացավ: Թեև Դին Լիժենի հետ երկրորդ մրցախաղում  աշխարհի չեմպիոնը պարտվեց 0-3 հաշվով, սակայն կայծակնային շախմատի երկու պարտիայից բաղկացած լրացուցիչ մրցախաղում հաղթեց (1,5-0,5)՝ վճռելով մրցակցության ելքը: Դին Լիժենը գրավեց 4-րդ տեղն ու արժանացավ 6,5 հազար դոլար պարգևավճարի: